Членови на Надзорниот комитет на американскиот Конгрес, кој го истражува случајот со Џефри Епштајн, ги засилија барањата поранешниот британски принц Ендру да сведочи за неговите врски со починатиот и осуден сексуален престапник.
Најмалку четворица демократи во комитетот ги обновија своите повици, иако панелот е контролиран од републиканците, кои засега не наведуваат дека ќе го поддржат тоа.
Според Би-Би-Си, овие повици доаѓаат откако британскиот крал Чарлс во четвртокот му ја одзеде титулата „принц“ на својот брат, по повеќе месеци притисок околу врската на Ендру со Епштајн. Ендру Маунтбатен Виндзор отсекогаш негираше какво било кривично дело.
„Ако сака да го исчисти своето име, ако сака да им оддаде правда на жртвите, ќе излезе и ќе одговори на прашања. Значи, тој очигледно знае што се случило и ние само сакаме да излезе и да ни каже што знае“, рече конгресменот Сухас Субрамањам.
Членот на Надзорниот комитет, Раџа Кришнамурти, за Би-Би-Си изјави дека треба да му се достави на Ендру формална судска покана, иако призна дека тоа ќе биде тешко да се стори додека поранешниот британски принц е надвор од САД.