Унапредување на соработката меѓу локалната самоуправа и приватниот сектор, привлекување нови инвестиции и подобро искористување на туристичките и економските потенцијали на Општина Чучер Сандево беа главни теми на работниот состанок меѓу претседателот на Стопанската комора на Северна Македонија, Бранко Азески, и градоначалникот на општината, Зоран Бајовски.
На средбата присуствуваа и Драганчо Апостолски, советник во Дирекцијата за економска и јавна дипломатија, како и Љупчо Велковски, сопственик на ИНБОКС Тренинг Центарот, каде што се одржа состанокот.
Од Стопанската комора информираат дека во разговорите била истакната потребата од создавање подобри услови за развој на микро, малите и средните бизниси, како и за поттикнување нови инвестиции во општината.
Азески посочи дека за целосно искористување на потенцијалите и создавање услови за одржлив локален економски развој е неопходно активно партнерство меѓу државата, локалната самоуправа и приватниот сектор. Тој нагласи дека важни се развојот на претприемништвото, поддршката за започнување сопствен бизнис и унапредувањето на туризмот како значаен економски сегмент.
Градоначалникот Бајовски истакна дека целта е да се промени досегашната слика за Чучер Сандево и општината да се позиционира како атрактивна туристичка дестинација, но и како средина во која стопанствениците ќе препознаат можности за инвестирање и развој.
На средбата било посочено дека општината располага со значаен природен и културно-историски потенцијал, а бројните цркви и манастири претставуваат можност за дополнително збогатување на туристичката понуда.
Во рамки на состанокот, на претседателот на Комората, Бранко Азески, му била доделена благодарница за поддршка и развој на локалните и руралните бизниси.
Чучер Сандево е една од поголемите приградски рурални општини, сместена во непосредна близина на главниот град. Општината располага со богати природни ресурси, шумски предели и планинска местоположба, кои создаваат услови за развој на активности поврзани со природата, спортот и рекреацијата. Дополнителна предност е отсуството на индустриски капацитети кои би претставувале значаен извор на загадување.