Директорот на Дирекцијата за заштита и спасување, Стојанче Ангелов, порача дека природата е „најголемиот контролор“ на сѐ што е изградено од човекот, по силното невреме што го зафати Скопје и предизвика сериозни материјални штети и соборени дрвја.
Ангелов нагласи дека природните непогоди на најсуров начин покажуваат дали при изградбата на објектите се почитувани сите закони, прописи и стандарди.
Тој посочи дека квалитетот на градбите доаѓа на тест токму при вакви временски неприлики:
„Оние градби кои не ги исполнуваат неопходните критериуми природата ги оштетува, корне или руши. Без двојни стандарди, без ургенции, без пријателски врски“, истакнува Ангелов.
Според него, природата не прави никаква селекција ниту кога станува збор за урбаното зеленило и старите дрвја низ градот.
Првиот човек на ДЗС детално го опиша дејството на природните сили врз нестабилните стебла:
„Природата не ја интересираат ниту еколошките организации кои ги штитат дрвјата дури и тогаш кога тие се стари, нестабилни или гнили. Природата чисти сѐ по ред. Ги корне или крши слабите гранки, корне и крши цели дрвја“, дополнува тој.
Поради ова, Ангелов упати директен апел до сите учесници во градежниот сектор за доследно почитување на нормите, бидејќи никој не знае кога повторно ќе следи следната природна проверка.
Истовремено, тој се обрати и до невладиниот сектор и активистите за заштита на животната средина за поголема соработка при проценките на терен.
Тој бара разбирање кога институциите оценуваат дека одредени дрвја мора да се исечат заради заштита на граѓаните:
„Безбедноста е на прво место“, порачува Ангелов.