Социјалните мрежи се преплавени со емотивни статуси на јавни личности, новинари и пријатели од младоста кои се простуваат од кантавторот Владо Јаневски, откривајќи детали од неговите почетоци во Скопје.
Јулијана Штрковска-Колариќ се присети на неговите тинејџерски денови поминати во скопската населба Чаир и првите чекори во музиката.
„Царство Небесно за Владо Јаневски! Се знаевме од тинејџерски денови, уште кога членуваше во групата „Тост Сендвич“, заедно со Агим Јонуз и да не ги набројувам другите чаирски романтичари. Другарувавме некогаш, а како растевме, се среќававме случајно и тогаш знаеше да ми каже дека ме гледа како убаво се трансформирам од девојче во девојка и веќе жена. Да, поминаа времиња и оставија траги од животот. Според мене како стареам, млад се упокои. Ама, како пееше некогаш … и да умрам млад, ич не ми е гајле… Почивај во мир!“, напиша таа.
Познатата новинарка Соња Алексоска Неделковска го сподели своето сеќавање за првата професионална средба во Гостивар и неговиот пристап кон пишувањето песни.
„Втората половина на деведесеттите. Бев водителка во гостиварското радио „Супер Нова“. Ми рекоа добро да се подготвам, затоа што мој гостин ќе биде Владо Јаневски. Немав трема, туку пријатна возбуда. Истиот ден ја водев и неговата промоција во дискотеката „Авалон“. Тоа беше нашата прва професионална средба. Со годините често се среќававме по разни професионални поводи. Последен пат, на прес-конференцијата по повод најавата на концертот со Бајага, си направивме мерак муабет за создавањето текстови. Ми рече: „Не импровизирам. Пишувам текстови инспириран само од вистински случки.“ Ех… да можеше ова да биде само импровизиран текст за некого, НЕКОГАШ И НЕГДЕ. А не приказна инспирирана од една болна вистина. Летај, Владо, во височините. Твоите текстови ќе живеат и ќе болат уште повеќе“, нагласи таа.
Мартин Јованоски во својата порака потенцираше дека неговите приказни им помогнале на многумина да поминат низ тешки животни фази.
„Секогаш првата асоцијација за Владо ми e песнава и настапов. “Не зори зоро” е една од ретките песни на кои секогаш плачам и се смеам истовремено, текст посилен и од најубавата поезија, текст кој може да искрши и камен на илјада парчиња. Пораснавме со Владо, со неговите песни ги поминавме и детството, и младоста…ги слушаме и сега. Колку само кризи, падови и маки минаа побрзо покрај неговите приказни, покрај неговите хитови. Почивај во мир и ти благодарам Маестро! Никогаш нема да бидеш заборавен!“, сподели Јованоски.
Борче Трајковски испрати последен поздрав во кој ги вметна насловите и мотивите од неговите најпознати евергрини.
„Почивај во мир Владо Јаневски… Некогаш и негде ќе се сретнеме пак, можеби на романтична вечер во чаирски парк, кога сите запалки ќе се запалат а стрелките на часовниците на полноќ ќе се бакнат, и ќе викнеш ајде дечко уште едно литро дај, нека не’ разбие црно тиквешко, и да нема крај. Ќе сјаеш вечно ко светулка во мрак… Фала ти Владо Јаневски за се’, и слава ти…“, се вели во неговиот статус.