Подготовката за новата учебна година и годинава носи значителен трошок за семејниот буџет. За основен училишен прибор со ранец потребни се најмалку околу 2.500 до 3.000 денари, додека за прваче, кое најчесто се опремува речиси од нула, сметката може да достигне од 5.000 до 10.000 денари.
Најголем дел од трошокот отпаѓа на ранецот, чија цена годинава се движи од околу 1.000 денари за поедноставни модели, до 4.000 или 5.000 денари за поскапите. Тетратките почнуваат од околу 15 до 25 денари, додека приборот за ликовно, фломастерите, темперите, несесерите и дополнителната опрема лесно додаваат уште неколку стотици денари на сметката.
Во споредба со минатата година, целокупниот трошок за образование не бележи драматичен раст, но кај одделни производи поскапувањето е значително. Лани ранците најчесто се движеа од 1.000 до 3.000 денари, додека годинава горната граница кај дел од моделите достигнува и до 5.000 денари.
Според синдикалната минимална кошница, трошоците за образование во август 2025 година изнесувале 7.097 денари, а годинава 7.192 денари. Тоа е раст од околу 1,3 проценти на годишно ниво.
Дополнително олеснување за родителите треба да донесе „училишната кошничка“, со која дел од училишниот прибор се продава со намалување од најмалку 15 проценти. Тоа значи дека кошничка од 3.000 денари би се намалила за околу 450 денари, а кај трошок од 5.000 денари заштедата би била околу 750 денари.
Сепак, во пресметката не се вклучени облека, обувки, спортска опрема и останатите трошоци што традиционално доаѓаат со почетокот на учебната година, па реалниот износ за целосно опремување на едно дете може да биде значително повисок.