Претставници на здруженијата на превозници од земјите на Западен Балкан денеска ќе се сретнат во Скопје за да договорат заеднички чекори околу проблемот со престојот на професионалните возачи во Шенген зоната.
Средбата е организирана по воведувањето на новите правила на Европската унија, според кои престојот во Шенген е ограничен на 90 дена во рамки на период од 180 дена. Ова особено ги погоди професионалните возачи кои поради природата на работата често престојуваат во земјите од Шенген.
Превозниците веќе протестираа и бараат возачите да бидат изземени од ова ограничување.
На првата ваква регионална средба во Скопје се очекува присуство на претставници од Црна Гора, Србија и Босна и Херцеговина. Целта е да се усогласат идните активности и заеднички да се изнајде решение за проблемот.
„Проблемот сè уште не е решен. Средбата е можност да ја утврдиме агендата за нашите идни активности“, изјави за МИА Биљана Муратовска од Асоцијацијата на превозници – МАКАМТРАНС.