Претседателката на државата, Гордана Сиљановска-Давкова, од денеска престојува во повеќедневна официјална посета на Република Словенија. Посетата, која има за цел продлабочување на билатералните односи и поддршката на македонските евроинтеграции, вклучува низа средби со словенечкиот државен врв, претставници на македонската дијаспора и бизнис заедницата.
Официјалниот протокол со највисоки државни почести е закажан за утре, кога претседателката ќе се сретне со својата словенечка колешка.
„Сиљановска-Давкова утре во Љубљана ќе биде пречекана со највисоки државни и воени почести од претседателката на Република Словенија, Наташа Пирц Мусар. Предвидено е претседателките да одржат тет-а-тет средба, по што ќе следува пленарен состанок на македонската и словенечката делегација. Сиљановска-Давкова ќе оствари средба и со претседателот на Државниот збор на Република Словенија, Зоран Стевановиќ. Во рамки на посетата на Словенија предвидено е претседателката Сиљановска-Давкова да положи венец пред Споменикот на жртвите од сите војни и жртвите поврзани со војните.“
Првиот ден од посетата е ставен во знак на поврзување со македонските иселеници и претставниците од бизнис секторот, со фокус на културното наследство и економската соработка.
„Македонската претседателка денеска ќе ја посети Македонската православна црква „Св. Климент Охридски“ во Љубљана и ќе оствари средба со членовите на Сојузот на Македонските културни друштва и Црковните одбори. Таа ќе се сретне и со македонски иселеници кои работат во областа на науката, културата, медицината. Претседателката Сиљановска-Давкова денеска ќе одржи состанок со членовите на Македонско-словенечкиот бизнис клуб, додека во Крањ ќе го посети Македонското културно друштво. Во вторник, претседателката Сиљановска-Давкова ќе одржи предавање на Правниот факултет во Љубљана на тема: „Уставни трансформации на патот кон ЕУ: Реформи или уставен инженеринг?“.“