Министерот за јавна администрација, Горан Минчев, денеска го промовираше Практичниот водич за комуникација и обезбедување услуги на лицата со оштетен слух. Водичот е изработен по иницијатива на Министерството од Даниела Дичовска, лиценциран толкувач на знаковен јазик, со цел да им обезбеди практични насоки на административните службеници во секојдневната работа.
На промоцијата присуствуваа Снежана Трпевска, национална координаторка за лица со попреченост при Владата, Сузана Стојановска од Дневниот центар „Доза среќа“ и Благица Димитровска од здружението „Инклузива“.
„Кога зборуваме за реформа на јавната администрација, не зборуваме само за закони, процедури и институции. Зборуваме за луѓето. За тоа дали еден граѓанин ќе може да добие навремена информација и дали ќе може рамноправно да ја оствари својата услуга. Нашата задача е да ги отстрануваме бариерите, а не граѓаните да се приспособуваат на бариерите на системот“, порача министерот Минчев.
Од Министерството истакнуваат дека пристапноста не треба да биде исклучок или посебна мерка, туку дел од секојдневната работа на институциите, со цел да се создаде администрација која нема да остави никого зад себе.