Претседателката Гордана Сиљановска-Давкова на 22. Европски самит во Салцбург се обрати на сесијата посветена на прашањето „Дали Европа (сè уште) е глобален играч?“, нагласувајќи дека интеграцијата на Западниот Балкан е клучна проверка за стратешката моќ на Унијата.
Таа потсети дека земјата е кандидат за членство веќе 21 година, со 17 позитивни извештаи и со целосна усогласеност со европската надворешна политика. Сепак, како што истакна, ниту една друга европска држава не поднела толку голем товар во интегративниот процес.
„Принудувањето на една држава да ја менува својата внатрешна правна структура за да се разреши историски спор отвора сериозно прашање за доследноста на европските принципи. Членот 4(2) од Договорот за ЕУ ја обврзува Унијата да ja почитува еднаквоста на државите-членки и нивните национални идентитети, вградени во нивните основни политички и уставни структури. А сепак, во нашиот случај, уставната промена условена од билатерален историски спор се претставува како тест за нашиот демократски капацитет“, рече Сиљановска-Давкова.
Претседателката предупреди дека одолговлекувањето на проширувањето создава опасен геополитички вакуум во регионот и порача дека Европа мора да биде похрабра и да се води според принципите на меритократијата.
„Ако сака поголема геополитичка тежина, Европа мора да биде похрабра и поконзистентна: помалку непредвидливост, повеќе меритократија; помалку патернализам, повеќе вистинско партнерство“, истакна претседателката.