Поранешните високи функционери на Ослободителната војска на Косово, Хашим Тачи, Кадри Весели, Реџеп Селими и Јакуп Красниќи, денеска во Хаг треба да ја слушнат првостепената пресуда во еден од најзначајните судски процеси поврзани со војството во Косово. Обвинителството побара казни од по 45 години затвор, додека обвинетите во целост ги отфрлаат наводите. Изрекувањето е закажано за 10 часот по средноевропско време пред Специјализираните совети на Косово.
Четворицата поранешни лидерски фигури се товарат по шест точки за злосторства против човештвото – меѓу кои прогон, затворање, мачење, убиство и присилно исчезнување – како и по четири точки за воени злосторства, објави 4news.mk. Според обвинението, делата биле извршени од март 1998 до септември 1999 година на повеќе локации во Косово и во северна Албанија, насочени против стотици цивили и лица кои не учествувале во борбите. Сите четворица претходно се изјаснија за невини, додека обвинението се потпира на докази за нивна индивидуална одговорност.
Судењето се одвива во амбиент на високи политички и општествени тензии. За голем дел од косовските Албанци, обвинетите остануваат симболи на борбата за независност, поради што изминатите денови беа организирани масовни собири во Приштина, како и протестен собир во Скопје на плоштадот „Скендербег“, каде поддршка изрази и поранешниот командант на ОНА, Џезаир Шаќири – Хоџа. Лидерот на ДУИ, Али Ахмети, претходно порача дека маршираат за поддршка на ослободителите и предупреди дека во случај на остра осудителна пресуда можни се ревонти и појава на незадоволни групи.
Од друга страна, Специјализираните совети нагласуваат дека судот не одлучува за легитимноста на борбата за независност или улогата на НАТО, туку исклучиво за индивидуалната кривична одговорност за конкретни дела против цивили. Овој процес отвора судир меѓу наративите – додека поддржувачите стравуваат од изедначување на борбата на УЧК со српските сили, семејствата на жртвите и исчезнатите инсистираат на безусловна индивидуална одговорност.