Само една недела пред смртта на Ратко Младиќ, српскиот претседател Александар Вучиќ побарал од Хаг да му биде дозволено последните денови да ги помине во болница во Србија, но барањето било одбиено, објави српски „Блиц“
Според информациите, Вучиќ го испратил писменото барање откако добил лекарски извештај за сериозно влошената здравствена состојба на Младиќ. Хашките власти и претходно во повеќе наврати одбивале барања на неговата одбрана за предвремено или хуманитарно ослободување.
Младиќ почина денеска во болничкото одделение на притворскиот центар на Обединетите нации во Хаг. Тој издржуваше доживотна казна затвор откако беше осуден за геноцид, злосторства против човештвото и воени злосторства извршени за време на војната во Босна и Херцеговина.
Неговиот адвокат Бранко Лукиќ изјави дека семејството ќе одлучи каде ќе биде пренесено и погребано телото. Според него, желбата на Младиќ била да биде погребан покрај неговата ќерка Ана на гробиштата Топчидер во Белград.
Лукиќ тврди и дека во последниот период во Хаг на Младиќ му била пружана палијативна нега и терапија за ублажување на болките. Процедурата за потврдување на смртта и подготовка на документацијата за пренесување на телото би можела да трае неколку дена.