Два месеца по полагањето на првиот од двата екстерни испити, Министерството за образование и наука ги објави конечните резултати од јунската матурска сесија, по разгледаните приговори.
Просечната оценка од сите три типа матура изнесува 3,66. Кај државната матура просечната оценка е 3,62, кај државната стручна матура 3,91, додека кај државната уметничка матура 3,59.
Министерката за образование и наука Весна Јаневска изјави дека е задоволна од постигнатиот успех, посочувајќи дека резултатот е речиси на исто ниво како минатогодишниот просек од 3,69, а е подобар во однос на 2024 година кога просекот бил 3,26.
„Ценам дека ова се објективни резултати поради подготвеноста на сите вклучени во организирањето на матурата“, рече Јаневска.
За полагање на екстерните испити во јунската сесија биле пријавени 14.587 ученици кои завршиле средно образование во учебната 2025/2026 година. Од нив, 12.184 полагале државна матура, 2.276 државна стручна матура, а 127 ученици државна уметничка матура.
На испитите не се појавиле 348 пријавени ученици, односно 2,39 отсто од вкупниот број.
Оваа година за првпат матурантите полагаа три типа матурски испит – државна матура, државна стручна матура и државна уметничка матура.
Најголем интерес имало за полагање англиски јазик, кој го избрале 13.208 ученици. Во зависност од типот на матурата, учениците имаа можност да изберат и други предмети, меѓу кои математика, француски, германски, руски и италијански јазик, како и историја кај уметничката матура.