Шеесет и деветгодишниот сопственик на викендица во штипската викенд населба Кумлак, кој беше повреден во вчерашниот пожар, е во добра и стабилна здравствена состојба.
Од Клиничката болница во Штип информираат дека пациентот е подобар, но поради здобиените изгореници по екстремитетите и вдишаниот чад, тој и понатаму ќе остане под буден лекарски надзор.
Мажот заработил изгореници од втор степен на двете потколеници и на левата рака во моментот кога се обидувал сам да го гасне пожарот кој го зафатил кровот на неговата викендица.
Според информациите од Дарко Коцев, пожарникар водич во ТППЕ-Штип, материјална штета е предизвикана на една викенд куќа во населбата.
Коцев истакна дека со брзата интервенција на противпожарните тимови од огнената стихија навреме се спасени пет други викендици, лозови и овошни насади, како и околната борова шума.
Пожарникарите денеска извршиле обиколка на местото на настанот во пет наврати, со цел да се осигура безбедноста на теренот каде што избувна огнот.
Како што вели Коцев, во моментов нема никакво чадење на теренот каде што вчера по 14 часот започна огнената стихија.
Од противпожарната единица додаваат дека очевидци на целиот настан тврдат дека пожарот бил намерно предизвикан од страна на пироман.