Поранешниот командант на Здружената команда на силите на романската армија, генерал-потполковник Дорин Јонита, е пронајден мртов во својот дом во Паулешти, округ Прахова.
Шеесет и едногодишниот генерал бил пронајден со прострелна рана во главата, а покрај неговото тело е пронајден пиштол „Глок“ што го поседувал легално, објавува романски „Либертатеа“. Неговата сопруга ги известила властите откако тој наводно ја напуштил куќата во текот на ноќта со оружјето и престанал да се јавува на телефон.
Од Полициската управа на округот Илфов изјавија:
„Во текот на ноќта, околу 1:24 часот, полицијата била известена од жена на возраст од околу 60 години, која пријавила дека нејзиниот сопруг, за кој е познато дека легално поседува оружје, ја напуштил куќата со пиштол во негова сопственост. Полицијата веднаш презела мерки за да го пронајде и лоцира, како и да спречи каква било опасност за него или за други луѓе“.
Телото на генералот го пронашол неговиот зет. Засега нема сомненија дека станува збор за убиство, а истражителите работат на утврдување на сите околности.
Во официјалното соопштение од полицијата се додава:
„Во текот на утрото, Полициската управа на округот Илфов била информирана дека 61-годишен маж бил пронајден мртов од неговите роднини, во зграда лоцирана на територијата на општина во округот Прахова. Полициските службеници, под надзор на надлежното обвинителство, спроведуваат истрага за прецизно да ги утврдат сите околности под кои се случил овој настан“.
Дорин Јонита беше еден од најистакнатите офицери во романската армија, со богата кариера и учество во меѓународни мисии. Истрагата е во тек.