Белгија беше потресена од веста за бруталниот грабеж на фудбалерот на Унион Сен Жилоа, Мохамед Фусеини, кој стана цел на организирана група разбојници на сред бел ден на улиците на Брисел. Целиот инцидент беше снимен од камера на минувач, а снимката набрзо стана јавна и предизвика бројни реакции.
Според белгискиот весник HLN, репрезентативецот на Гана бил во паркиран автомобил кога му се приближила група од пет маскирани мажи со качулки. Напаѓачите не се двоумеле ниту за момент, насилно ја отвориле вратата од автомобилот, го извлекле фудбалерот и се обиделе да му го грабнат мобилниот телефон од рацете.
Фусеини се обидел да се спротивстави, но против бројно посилните напаѓачи немал многу шанси. Додека четворица разбојници го држеле и го совладале, петтиот ја пребарал внатрешноста на автомобилот во потрага по вредни предмети.
На крајот успеале да му го украдат луксузниот часовник „Ролекс Дејтјуст“, за кој белгиските медиуми проценуваат дека вреди помеѓу 8.000 и 14.000 евра, а потоа избегале од местото на настанот.
Иако доживеал голем шок, охрабрувачки вести доаѓаат од Унион Сен-Жилоа. Според клубот, Фусеини не претрпел никакви сериозни физички повреди, а следниот ден се приклучил на тренингот на тимот. Сепак, се нагласува дека е сосема разбирливо што фудбалерот е сè уште психички потресен од трауматското искуство низ кое поминал. Полицијата започна истрага и работи на идентификување на сторителите.