По неколкучасовна исцрпувачка битка, противпожарните екипи успеаја целосно да изгаснат пет од вкупно шест големи пожари на отворен простор кои денеска сериозно се закануваа да направат огромна штета низ државата.
Најкритично во текот на денот беше во Штип и Тетово, каде пламените јазици избувнаа во непосредна близина на индустриски капацитети, стратешки објекти и во самото централно градско подрачје.
Пожарникарите извојуваа победа кај штипскиот локалитет „Исар“, каде сувата вегетација гореше близу куќите, како и во индустриската зона каде беа загрозени Штипската млекара и фабриката „Албатрос“.
Огнената стихија е успешно скротена и во Тетово, каде противпожарните тимови спречија катастрофа со тоа што навреме го локализираа пожарот кој избувна кај големите силоси на „Жито Полог“.
Во моментов, на територијата на целата држава останува активна уште само една сериозна точка во источниот регион, каде пламенот зафати нискостеблеста деградирана шума меѓу неколку села.
Станува збор за пограничниот појас меѓу општините Чешиново-Облешево и Пробиштип, поточно во атарите на селата Новоселани, Лепопелци, Бучиште и Неокази, каде екипите сѐ уште се на терен.
„До 18:00 часот на 03.07.2026 година, на територијата на државата се регистрирани 6 пожари на отворен простор, од кои 1 е активен, а 5 се изгаснати. Изгаснати пожари: Општина Штип – с. Чардаклија (ниска вегетација и жито); Општина Штип – с. Стар Караорман (ниска вегетација и стрниште); Општина Штип – местото викано „Исар“; Општина Штип – помеѓу Штипска млекара и М.К. Албатрос; Општина Тетово – кај силосите на Жито Полог“, се наведува во официјалниот извештај.