Во приемниот центар во спортската сала „Рибњак“ во Омиш во моментов има околу 1.500 евакуирани лица, изјави за Хрватското радио директорката на локалниот Црвен крст, Ана Стејскал, а пренесе Индекс.хр.
Според нејзините информации, до полноќ биле регистрирани над 2.000 луѓе, но дел од нив веќе го напуштиле подрачјето или се сместиле кај свои роднини.
Стејскал истакна дека надлежните служби се подготвени за евентуални нови евакуации, но во моментот нема такви очекувања.
Граѓаните ќе останат во салата сè додека не се нормализира сообраќајот и не се стават под контрола опожарените подрачја.
„Временските услови се навистина неповолни во моментов. Дува ветер во сите правци, сè е зачадено и не знам кога ќе можат да се вратат евакуираните“, рече Стејскал.
Таа потврди дека во центарот се обезбедени доволни количини храна, вода, лекови и сите основни потребни материјали.
Во акцијата се вклучија бројни волонтери, меѓу кои фармацевти и медицински лица, додека екипите на Итната медицинска помош постојано им помагаат на најзагрозените.
За сите сместени лица синоќа беа доставени основни намирници, а во текот на денешниот ден ќе бидат организирани и топли оброци.