Поради пожар на тешко пристапен терен кај селото Горна Лешница, во општина Желино, денеска беше побарана воздушна поддршка за соборување на огнената стихија.
На бројот за итни повици 112 се јавил командирот на ТППЕ Тетово, кој побарал итна интервенција од воздухоплов.
Според првичните информации, пламенот избувнал на исклучително непристапен и стрмен терен, што значително ја отежнало соодветната реакција на противпожарните екипи од земја.
Пожарникарите од ТППЕ Тетово првично се обиделе да го гаснат огнот рачно, со користење напртњачи. Сепак, поради ризикот и условите на теренот, било проценето дека е неопходна поддршка од воздух.
По добиеното барање, во гаснењето веднаш бил вклучен „ер трактор“ со цел побрзо локализирање на пожарот и спречување на неговото понатамошно ширење кон околната вегетација.
Надлежните служби информираат дека продолжуваат внимателно да ја следат состојбата на теренот.