Грчките земјоделци денеска околу 14 часот по локално време повторно го затворија граничниот премин Евзони (Богородица) за влез и излез од Грција кон Северна Македонија. Блокадата се очекува да трае до 22 часот вечерва.
На грчката страна на Евзони се паркирани над 300 трактори. Блокади на овој премин имаше и вчера, во претпладневните часови, како и од 18 до 22:30 часот, по што сообраќајот беше нормализиран до денешниот нов прекин.
Низ цела Грција, земјоделците имаат поставено вкупно 14 блока со над 6.000 трактори. Два од овие блока се на граничните премини кон нашата земја: Евзони и Ники (Меџитлија).
На граничниот премин Ники, блокадата денеска траела кратко и се однесувала само на товарни возила, додека патничкиот сообраќај се одвивал.
Засега, граничниот премин Дојран останува единствениот на кој нема блокади и сообраќајот се одвива непречено.
Денеска се случија инциденти во близина на Солун, каде земјоделците се обиделе да постават нов блок кај солунскиот аеродром, но биле спречени од полицијата, која употребила солзавец.
Големи блокади има и во внатрешноста на Грција:
- Кај Никеа, во близина на Лариса: Околу 1.800 трактори и затворен автопатот Солун-Атина.
- Кај градот Кардица: Над 2.000 трактори.
На повеќе локации на блокадите, земјоделците поставија новогодишни елки, што се толкува како порака дека нема да отстапат и дека се подготвени празниците да ги поминат на улица. Протестите започнаа во неделата и засега нема информации за нивниот краен рок.