Двајца пожарникари се повредени при интервенцијата за локализирање на пожарот на Пелистер, кој вчера се прошири од ресенскиот регион кон планината.
Според информациите од терен, пожарникарите се здобиле со повреди додека учествувале во гаснењето на огнот на тешко пристапен терен. Тие биле извлечени од местото и им била укажана медицинска помош.
Пожарот во изминатите часови зафатил сува трева, ниска вегетација и шумски појас, а во гаснењето биле ангажирани екипи од земја, како и противпожарни авиони „ер трактори“.
Надлежните служби соопштуваат дека пожарот е ставен под контрола и дека се работи на негово целосно локализирање, но екипите остануваат на терен поради можноста од повторно разгорување.
Причината за пожарот засега не е официјално соопштена, а надлежните продолжуваат со следење на состојбата на Пелистер.