Лесната пешадиска баталјонска група на чекор до целосна интеграција во структурите на НАТО.
Доколку месецов вежбата Блесок 26, добие зелено светло од оценувачите на Алијансата, единицата ќе биде на целосно располагање на командантот на НАТО, подготвена да одговори на предизвиците кои ги носат гео-политичките тензии, од Блискиот Исток до руско-украинскиот конфликт.
Според надлежните засега најава за ангажирање на единицата нема, но сепак нашите сили веќе активно придонесуваат во мисиите за одвраќање и колективна одбрана.
„Се на располагање. Дали има најави за нивно користење, во моментов не. Меѓутоа ние и сега учествуваме со свои сили, кога станува збор за одвраќање, односно одбрана на границите со мисиите и во Романија и во Латвија, и во Косово, изјави Сашко Лафчиски, началник на Генералштабот на Армијата на денешниот брифинг со новинарите.
„Блесок 26“ ќе се одржува од 19-ти до 27-ми април. Вежбата ќе биде тест за борбената готовност на баталјонската група. Станува збор за тактичка теренска вежба со воени гаѓања, во која учество ќе земат 1.500 припадници на Армијата. Ќе бидат користени оклопни возила, транспорниот хеликоптер, минофлачи, беспилотни летала, оклопните возила за пронаоѓање и уништување експлозинвни направи Хаски 1 и 2. Страјкерите нема да бидат вклучени поради административни причини.
Единиците ќе треба да покажат колку се подготвени да се снајдат во над 20 фиктивни сценарија со креирани настани и инциденти, вклучително и спротиставени сили. Вежбата ќе се реализира под постојан надзор и управување, по што ќе следува оценување од страна на 40 сертифицирани експерти. Најголем дел од активностите ќе се одвиваат на Криволак.