Премиерот Христијан Мицкоски е во паника поради случувањата со Алта банка и се обидува да ја замолчи опозицијата со закани и кривични пријави, обвини на денешната прес-конференција членката на Извршниот одбор на СДСМ, Наташа Поповиќ.
Според нејзините наводи, Мицкоски и гувернерот Трајко Славески ја донеле оваа банка во земјава, со што, како што тврди опозицијата, ги загрозиле парите на граѓаните и банкарскиот систем.
„За „чувствата“ требаше да мисли кога ја донесе перланицата на Вучиќ во Македонија, поради што граѓаните сега не можат да дојдат до своите пари. Сега во страв од одговорност Христијан Мицкоски посегнува по истиот модел на неговиот шеф, Александар Вучиќ и она што тој го правеше во Србија, сака со да ја замолчи опозицијата“, изјави Поповиќ.
Таа посочи дека власта најпрво ја обвинувала СДСМ за хистерија и саботажа, за потоа преку Славески да поднесува кривични пријави, а сега премиерот да најавува законски измени и кривично гонење поради, како што вели, кажаната вистина за банката.
„Мицкоски зборува за „хорор соништа“ затоа што слободен говор во јаве му пречи. На вистината во говорот на СДСМ не може да се спротистави со аргументи. Сака да не жигосува како опасност затоа што сме единствена неконтролирана опозиција“, нагласи Поповиќ, додавајќи дека СДСМ уште пред 11 месеци предупредувала за овој случај.
На крајот од обраќањето, таа оцени дека власта сака да воспостави контрола врз слободата на говорот и медиумите, порачувајќи дека партијата нема да се повлече.
„Знаеме дека се плашиш, доаѓа време на одговорност за Алта банка и за целиот криминал. СДСМ нема да ја замолчиш“, заклучи Поповиќ.