Обилните врнежи во источниот регион предизвикаа поплавување на простории и дворови во Општина Чешиново-Облешево, а најпогодени се селата Чешиново, Облешево и Чифлик.
Според Центарот за управување со кризи (ЦУК), реките Брегалница и Кочанска река се со значително зголемен водостој, при што на одредени локации во општините Штип и Чешиново-Облешево веќе е забележано нивно излевање од коритата.
Локалната самоуправа ги ангажираше сите расположливи ресурси, а во интервенциите се вклучени и ТППЕ Кочани, Водостопанство „Брегалница“ и РЦУК Кочани. Поради обемот на поплавите, побарана е дополнителна материјално-техничка поддршка за испумпување на водата од објектите.
Покрај поплавите, дождот предизвика и свлечишта на експресниот пат Радовиш–Штип и на правецот Злетово – брана Кнежево, каде интервенираа екипите на „Македонија пат“.
„Лизгање на земјште во с.Липково место викано Кисела Вода. За настанатата состојба од Општина Липково сме известени дека Општина Липково располага со ограничени ресурси за интервенции од ваков тип, како и поради сериозноста и ризикот од понатамошно влошување на состојбата, побарано е во санирањето на свлечиштето да се вклучат и државните институции“, информираат од ЦУК.