Во попладневните часови се очекува македонските граѓани кои побарале евакуација од Израел да полетаат кон Скопје со владиниот авион. Со овој лет, како што соопшти Министерството за надворешни работи и надворешна трговија, целосно ќе заврши евакуацијата на македонските државјани од Израел.
Во останатите подрачја погодени од воениот конфликт, до денес 505 македонски граѓани се обратиле до Амбасадата во Абу Даби, 31 лице во Кувајт, 14 лица во Бахреин и 141 лице во Доха.
„Во наредните денови се очекува да започне враќањето на македонските државјани од Обединетите Арапски Емирати, како и на граѓаните кои се наоѓаат во Катар, Бахреин и Кувајт. За нив е предвидено организирано враќање со летови преку Кралството Саудиска Арабија. Процесот се спроведува согласно веќе изготвен план, во согласност со безбедносните услови и во координација со надлежните институции“, соопшти Министерството.
Од МНРиНТ апелираат до сите македонски државјани кои сè уште не контактирале со дипломатско-конзуларните претставништва, а имаат потреба од асистенција, тоа да го сторат што е можно поскоро преку дежурните телефонски броеви или СОС-бројот на Министерството.