Државната комисија по жалби за јавни набавки по службена должност донесе решение со кое целосно ја поништи јавната набавка за набавка на електрични автобуси и полначи.
Од Министерството за транспорт веднаш излегоа со став и најавија дека целиот процес ќе биде обновен за многу кратко време.
„Министерството за транспорт Ве известува дека согласно своите надлежности, предметната јавна набавка повторно ќе ја објави согласно законските прописи во најбрз можен рок“, се наведува во соопштението.
Претходно, за најповолен понудувач на овој јавен повик за 150 еколошки возила и 75 полначи беше избрана понудата на унгарски „Икарус“ и австриски „ЕВН“.
Цената по возило според тогашните пресметки изнесуваше 19.350.000 денари, односно околу 314 илјади евра по автобус, што тогаш беше оценето како конкурентно на пазарот.
Според првичната одлука, компанијата „Икарус“ требаше да ги испорача електричните автобуси, додека „ЕВН“ беше задолжена за поставување на станиците за полнење.
Техничките спецификации налагаа автобусите да имаат моќност од најмалку 300 kW, капацитет за минимум 66 патници и автоматски систем за ладење и греење.
Во договорот беше предвидено избраниот оператор да врши тековно одржување и сервисирање, како и да обезбеди резервни делови во период од 10 години.
Планот предвидуваше првите 30 автобуси и 15 станици да пристигнат во рок до шест месеци, а останатите возила сукцесивно во наредните 12 и 18 месеци.