Млад 20-годишен турист од Португалија е убиен во вторникот наутро во Ксамил, Албанија, а неговото тело било пронајдено на плажата покрај лежалки, каде што наводно лежело со часови.
Главниот осомничен за убиството, 29-годишниот Сократес Вата, е уапсен во местото Леван кај Фиер во замаена полициска операција. Тој бил откриен додека се криел во багажникот на автомобил што се движел кон Тирана.
Во возилото се превезувале двајца турски државјани кои, според властите, знаеле за неговото присуство и имале план да му овозможат бегство.
Во рамки на истрагата за целосно расветлување на случајот, полицијата досега привела 41 лице, при што за 11 од нив е одреден притвор, а по уште едно лице интензивно се трага.
Според полициските сознанија, инцидентот започнал во раните утрински часови на 18 август во ноќен клуб во склоп на туристички комплекс, а завршил на самата плажа.
За време на физичката пресметка, Вата со остар предмет му нанел повеќекратни повреди во пределот на градите и грбот на 20-годишниот Португалец, додека во нападот учествувале и други лица.
Истрагата покажала дека во тепачката учествувале и вработени во ноќниот клуб, кои по физичкиот напад го напуштиле местото на настанот. Според првичните информации, судирот избивал по конфликт во кој била вмешана девојка, а жртвата се обидела да интервенира за да ја смири ситуацијата.
Под истрага е и улогата на лицата од заштитата и обезбедувањето на објектот, кои ниту интервенирале за да го спречат инцидентот, ниту ги известиле надлежните органи.
Инаку, уапсениот Сократес Вата и од претходно ѝ е познат на полицијата. Тој во април годинава во Британија учествувал во полициска потера со автомобил со лажни таблички, во кој подоцна бил пронајден кокаин.