Министерството за внатрешни работи и Основното јавно обвинителство за гонење на организиран криминал и корупција ја потврдија акцијата во која се приведени десетина лица, а меѓу нив и функционерот на ДУИ, Бујар Дардишта.
„Под раководство на јавен обвинител од ОЈО ГОКК, полициски службеници од Одделот за сузбивање на организиран и сериозен криминал при БЈБ – МВР од ноќеска спроведуваат активности на повеќе локации во Скопје и Куманово, поради постоење на основано сомневање за сторени кривични дела од финансиско економска природа. Повеќе детали ќе бидат споделени по завршување на теренските активности.“ – се вели во соопштението на ОЈО ГОКК
Слично соопштение испрати и МВР.
“Полициски службеници од Одделот за сузбивање на организиран и сериозен криминал МВР под раководство на јавен обвинител од ОЈО ГОКК, од ноќеска спроведуваат активности на повеќе локации во Скопје и Куманово, поради постоење на основано сомневање за сторени кривични дела од финансиско економска природа. Повеќе детали ќе бидат споделени по завршување на теренските активности.“ – се вели во информацијата на МВР.
Информациите ги потврди и министерот Панче Тошковски.
Бујар Дардишта, беше директор на Управата за водење на матични книги, а потоа и управител на едно од новоформираните три претпријатија на ЕСМ за топлинска енергија за затоплување на скопјани на местото на БЕГ.
Дардишта стана „популарен“ во јавноста откако Државниот завод за ревизија утврди дека во 2019 година кога тој бил директор на Управата биле издадени 21.957 погрешни изводи, односно 4 отсто од вкупниот број издадени изводи од матичните книги. Во реализираната ревизија бил констатиран кусок од 94.451 извод во матичните книги во Скопје, Тетово, Ресен, Гостивар и во Прилеп. Односно, ДЗР утврдил дека за толку обрасци на изводи не се наплатени ниту административни такси.
Последен пат неговото име се споменуваше за време на собирот на УЧК во центарот на Скопје каде тој беше претставник на организациониот одбор.