Комората за интегрирано приватно здравство (КИПЗ) стана дел од Сојузот на стопански комори, со што приватното здравство добива организиран и институционален глас во рамки на бизнис-заедницата во земјава.
Од КИПЗ оценуваат дека со членството во ССК се зајакнува позицијата на секторот, кој отсега ќе може поактивно да учествува во креирањето на економските и здравствените политики.
Иницијаторката на идејата, Татјана Велиновска – Димовска, истакна дека ова претставува почеток на нова фаза во институционалниот развој на Комората.
„Денес ја отвораме првата страница од институционалниот живот на Комората за интегрирано приватно здравство. Пред нас е обврската да ја оправдаме довербата што ни е укажана и да покажеме дека приватното здравство знае да се организира, да предлага решенија и да биде конструктивен партнер во креирањето на здравствените политики. Верувам дека ова е почеток на една успешна приказна која заеднички ќе ја градиме“, изјави Велиновска – Димовска.
Таа изрази благодарност до раководството на Сојузот на стопански комори за укажаната доверба, нагласувајќи дека приклучувањето во ССК претставува и признание за значењето на приватното здравство како економски сектор и партнер во развојот на државата.