Денеска и утре се одржува првиот рок за пријавување на кандидатите кои сакаат да се запишат на прва година на Универзитетот „Св. Кирил и Методиј“ во Скопје.
За академската 2026/2027 година, на 23-те факултети на УКИМ се предвидени вкупно 8.851 место за бруцоши. Од нив, 4.395 места се наменети за редовни студенти кои ќе се финансираат од државниот буџет, 3.621 за редовни студенти со кофинансирање, а 835 за вонредни студенти. Новата академска година започнува на 1 октомври.
Меѓу факултетите со најголем број слободни места се Медицинскиот со 950, Филолошкиот со 805, ФИНКИ со 800, Филозофскиот со 635, Природно-математичкиот со 626, Економскиот со 655, ФЕИТ и Машинскиот со по 600, како и Правниот факултет со 555 места.
За студентите во државната квота надоместокот за студирање изнесува 200 евра во денарска противвредност. Редовните студенти кои кофинансираат и вонредните студенти плаќаат школарина од 400 евра.
Според министерката за образование и наука Весна Јаневска, годинава бројот на местата на сите универзитети е намален за околу 2.000, по направената анализа на потребите на пазарот на трудот. Намалувањето најмногу се однесува на области каде што има поголем број невработени, како бизнис-администрација, јавна администрација, економија и право.
Од друга страна, квотите во техничките науки, информатиката, машинството и градежништвото се задржани речиси на исто ниво, имајќи ја предвид високата стапка на вработливост во овие професии.
По завршувањето на првиот рок, конечните ранг-листи на УКИМ ќе бидат објавени на 27 август, додека запишувањето на примените кандидати ќе се одржи на 3 и 4 септември.
Вториот рок за пријавување е закажан за 10 и 11 септември, а третиот на 23 септември, на факултетите каде што ќе останат слободни места.
Пред пријавувањето, кандидатите треба да се регистрираат преку системот upisi.ukim.mk и да ја пополнат електронската пријава во iKnow-системот. Пријавувањето потоа се врши во службата за студентски прашања на избраниот факултет.
Условите за упис, потребната документација, критериумите за селекција и начинот на пресметување на бодовите се утврдени во конкурсот на УКИМ. Во него се наведени и екстерните и интерните предмети од државната матура што се соодветни за пријавување на различните студиски програми.