Почина истакнатиот македонски музичар и бас гитарист Љубомир Стојсављевиќ-Кучкар, препознатлив како дел од влијателната музичка сцена во 1980-тите и член на култниот бенд „Бастион“.
Роден во 1959 година, својата музичка кариера ја започнал во групата „Уста на уста“, а подоцна станал дел од „Бастион“, каде што соработувал со Кирил Џајковски, Ана Костовска и Милчо Манчевски.
Бендот важи за пионер на македонскиот њу вејв звук и е меѓу првите домашни состави што снимале во студиото на „ПГП РТБ“. Нивните песни како „Холивуд“, „Мистер Комплекс“, „Деца на Сонцето“, „Лице во огледало“, „Месечина во шолја“ и „Молитва“ и денес се дел од музичкото наследство.
Покрај работата со „Бастион“, Стојсављевиќ беше активен и во други музички проекти. Во 2020 година го издаде албумот „СД4“ заедно со Владан Дробицки, Панче Бујуклиев и Гоце Наумов под етикетата на „ПМГЏез“, а настапуваше и на концертниот албум на групата „Парамециум“, предводена од Гарабет Тавитјан.