Џез-уметницата и добитничка на Греми награда Касандра Вилсон почина на 70-годишна возраст во Џексон, Мисисипи.
Според изјавата на нејзиниот менаџер за џез-радио станицата WBGO, Вилсон починала „мирно дома опкружена со семејство, блиски пријатели и нејзиниот менаџер“. Причината за смртта сè уште не е објавена.
По нејзиното заминување, бројни колеги и пријатели упатија пораки за збогување на социјалните мрежи. Пејачката Џил Скот напиша: „Мек топол песок. Длабоко предење. Величествени излевања. Страсна искреност. Грациозност. Интензитет. Прекрасната Касандра Вилсон. Навистина“.
Џулс Холанд на Инстаграм напиша дека веста е „толку тажна“, додавајќи: „Испраќам љубов и сочувство до сите нејзини пријатели и семејство“.
Почит ѝ оддаде и Скин од „Сканк Ананси“ (Skunk Anansie): „Толку тажна вест, таа беше прекрасна пејачка, најдобри желби до нејзиното семејство и пријатели“.
Касандра Вилсон е родена во Џексон, Мисисипи, во семејството на Херман Фолкс помладиот и Мери Мекданиел. Како најмлада од трите деца, уште од мала била изложена на џезот и Мотаун музиката, а на шестгодишна возраст почнала да учи класично пијано.
Во младоста свирела кларинет во марширачки оркестри, а со помош на својот татко научила да свири гитара, по што почнала да пишува и свои народни песни. За време на студиите по масовни комуникации во Џексон, настапувала со разни Р&Б, фанк и поп-состави.
По дипломирањето се преселила во Њу Орлеанс каде ја градела џез-кариерата под менторство на Ерл Турбинтон, Алвин Батиста и Елис Марсалис. Подоцна во Њујорк, заедно со саксофонистот Стив Колман, го формираше колективот М-Бејс (M-Base).
Во својата богата соло-кариера, Вилсон го издаде признатиот албум „Blue Skies“ (1988), како и изданието „New Moon Daughter“ за „Blue Note“, за кое во 1997 година ја освои наградата Греми за најдобар џез-вокален албум. Вториот Греми трофеј го освои во 2007 година за албумот „Loverly“.