Петар Мрдовиќ (34), кој е уапсен под сомнение дека во ноќта меѓу понеделник и вторник го убил Миле П. (40) во селото Опалјеник кај Ивањица, пред една година доживеал трагедија во која настрадале неговите двајца помлади браќа, Богослав (27) и Драгослав Мрдовиќ (26).
Жителите на селото каде што се случило злосторството велат дека по давењето на браќата Мрдовиќ „веќе не бил истиот“ и дека почнале да се плашат од него.
Мрдовиќ, како што потсетуваат српските медиуми, е осомничен дека кобната ноќ седел во кафеана со Миле П., почекал тој да заспие, насилно влегол во куќата и на човекот, кој лежел во креветот, му испукал два куршума во главата.
Иако првично се сомневало дека мотивот бил грабеж, бидејќи Миле наводно во кафеаната кажал дека добил пари од продажба на малини, истражителите ја отфрлиле оваа верзија. Во куќата каде што се случило убиството биле пронајдени сите заштедени пари на жртвата. Наводно, Миле и осомничениот биле добри пријатели и често седеле заедно.
Еден жител за „Курир“ раскажал дека Миле бил вреден човек, штедел и не ги трошел парите. По смртта на татко му, живеел сам. За осомничениот вели дека пред околу десет години се доселил од Црна Гора во Ариље, каде што барал работа.
Тој додава дека Мрдовиќ минатото лето доживеал голема трагедија, кога во реката Тара му се удавиле двајцата браќа. Според неговите зборови, оттогаш бил „поинаков“.
Браќата Богослав и Драгослав Мрдовиќ трагично настрадале во реката Тара кај Мојковац во Црна Гора на 22 јули минатата година.
Според сведочењето на очевидец, браќата играле фудбал покрај реката, кога едниот решил да влезе во водата. Се претпоставува дека доживеал срцев удар. Другиот брат се обидел да го спаси, но бидејќи не бил добар пливач, и тој се удавил.
Познати на браќата тогаш раскажале дека тие потекнувале од многудетно, чесно и работливо семејство со вкупно 12 деца – четири ќерки и осум синови.
Жител на Ариље, кој го познавал семејството, вели дека трагедијата ги променила и Петар и неговото семејство. Тој додава дека неговата сестра е мажена во Опалјеник и дека не може да замисли како семејството се чувствува по сознанието дека Петар е осомничен за убиство.
Осомничениот, според досегашните информации, по убиството наводно отишол кај сестра му, која живее во истото село, таму преспал и појадувал, а потоа се вратил во Ариље, каде што бил уапсен.