Собранието со 59 гласа „за“, три гласа „против“ и без воздражни го изгласа носењето по скратена постапка на Предлогот на законот за изменување и дополнување на Изборниот законик. Потпретседателот на Собранието, Антонијо Милошоски, ги задолжи Комисијата за политички систем и односи меѓу заедниците и Законодавно-правната комисија да започнат расправа по овој предлог.
Предлогот до законодавниот дом е доставен од група пратеници, меѓу кои Милошоски, Таири, Стојчевски, Беџети и Василевска, а со измените се предвидува електронско гласање на дијаспората и измени во државното финансирање на партиите.
Образложувајќи ја скратената постапка, предлагачот посочи дека за решението се дискутирало четири месеци во Министерството за правда, каде учествувале речиси сите партии, освен СДСМ која подоцна се повлекла.
„Во рамките на овие дискусии се согласивме околу 28 препораки на ОДИХР, коишто беа консензуално прифатени. Во работната група во Министерството за правда за ниту една тема немаше надгласување и секогаш се одеше со консензус. Ќе имаме можност тие работи да ги дискутираме и за време на собраниската и за време на комисиската седница“, изјави Милошоски.
Во однос на изборниот модел, Милошоски укажа дека и покрај барањата за една изборна единица, поради недостиг на консензус, останува сегашното решение со шест изборни единици. За дијаспората појасни дека е постигнат договор за безбедно електронско гласање по примерот на Франција и Естонија.
„Морам да напоменам дека учестото на претставници од ДИК, Државниот завод за ревизија, АВМУ и Антикорупциска беше од голема помош, бидејќи овие институции излегоа со свои перпоаки кои во најголем дел беа прифатени како да се направат измени во Изборниот законик кои на овие институции може да им го олеснат спроведувањето на изборите, во смисла да бидат демократски, фер, транспарентни и ефикасни“, изјави Милошоски.
Тој додаде дека за моделот за користење средства за изборно рекламирање бил постигнат едногласен консензус во работната група, што го оцени како солидно унапредување на нормите.
„Немаше ниту една партија која надгласала друга или некои преставници на политички партии да занемариле предлог на други колеги од политичките партии и ценам дека овој постигнат консензус од најголем број од политичките партии кои учествуваа во Работната група во Министерството за правда треба да се цени како солидно постигнување и унапредување на нормите на Изборниот законик. Согласно тоа сметам дека би било добро во скратена постапка истиот да биде усвоен и поддржан консензуално од сите политичк партии во Собранието“, порача Милошоски.
Од опозицијата, координаторот на СДСМ Оливер Спасовски побара точката да биде симната од дневен ред, потсетувајќи дека партијата ја напуштила работната група во моментот кога мнозинството одлучило да го измени Законот за влада.
„Точно е дека СДСМ започна да работи во работната група којашто беше за подготовка на Изборниот законик, но мора да потсетиме дека ја напуштивме во моментот кога одлучивте како парламентарно мнозинство да го измените Законот за влада, кој исто така, е донесен со консензус. На самата работна група на почеток укажавме дека носењето на Изборниот законик треба исклучиво да биде со консензус помеѓу политичките субјкети“, појасни Спасовски.
Симнување на точката побараа и пратениците Сашко Јанчев од Левица, кој нагласи дека нема консензус, како и Моника Зајкова, која укажа дека се симулира консензус. И покрај трите поединечни гласања, предлозите за симнување беа одбиени, по што Собранието со 57 гласа „за“ го усвои дневниот ред со Изборниот законик како единствена точка.