Македонија и денеска ќе биде под влијание на нестабилна воздушна маса, која ќе донесе променливо облачно време со локални врнежи од дожд и грмежи.
Според прогнозата, на повеќе места се очекуваат интензивни врнежи, при што локално може да наврнат повеќе од 15 литри дожд на квадратен метар. Невремето ќе биде проследено со силни грмежи, ветер што повремено ќе надминува 60 километри на час, а можно е и појава на град.
Утринските температури ќе се движат меѓу 11 и 19 степени, додека дневните ќе достигнат од 27 до 35 степени.
И во Скопје се најавува нестабилно време со променлива облачност, повремен дожд, грмежи и засилен ветер. Во одделни делови од котлината постои можност за краткотрајно невреме со пообилни врнежи и град. Температурата ќе се движи од минимални 17 до максимални 32 степени.
Од Управата за хидрометеоролошки работи информираат дека слични временски услови ќе преовладуваат и утре, кога повторно се очекуваат локални невремиња со пороен дожд, електрични празнења, силен ветер и можност за град.
По завршувањето на овој нестабилен период, следува стабилизација на времето. Од петок се очекува претежно сончево и стабилно време, а во сабота ќе дува умерен до засилен северен ветер.