Во Основниот кривичен суд Скопје денеска продолжува судскиот процес за случајот „Државна лотарија“, откако првообвинетиот Перпарим Бајрами, поранешен директор на Државна лотарија, минатата недела се предаде на македонските власти.
Бајрами, кој претходно ја напушти земјава и за него беше распишана меѓународна потерница, на 9 септември сам се пријавил на граничниот премин „Блаце“. По предавањето бил спроведен во затворот во Скопје, каде што ја издржува мерката притвор што претходно му била определена.
Во предметот, освен Бајрами, обвинети се и поранешниот вицепремиер Артан Груби, како и Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
Судењето започна минатата недела. На првото рочиште, обвинетите се изјаснија дека не се виновни. Бајрами тогаш не беше присутен бидејќи сè уште беше недостапен за органите на прогонот, додека Башким Авдиу побара обвинението да му биде доставено во писмена форма на албански јазик, наведувајќи дека не го разбира обвинението.
Обвинението го застапуваат јавните обвинители Даниел Коцев и Александар Давчевски. Според обвинителниот акт, случајот се однесува на постапувања во периодот 2023-2024 година, при што обвинетите, според Обвинителството, ги пречекориле своите службени овластувања и предизвикале штета на Државна лотарија од 596.125.511 денари.
На денешното рочиште се очекува процесот да продолжи со изведување на доказите и преземање на следните процесни дејствија.