Холандија го регистрираше првиот смртен случај од западнонилски вирус по шест години. Лице од покраината Утрехт починало во болница по заразување со вирусот, соопшти холандскиот Национален институт за јавно здравје и животна средина – РИВМ.
Вирусот годинава е детектиран во три холандски покраини – Утрехт, Северен Брабант и Јужна Холандија. Уште двајца заразени пациенти во моментов се на болничко лекување.
Западнонилскиот вирус минатата недела беше откриен во Холандија првпат од 2020 година, кога инфекцијата беше потврдена кај крводарител од Утрехт кој не патувал во странство. Засега не е познато дали станува збор за истото лице кое подоцна починало.
Вирусот се пренесува преку заразени комарци и најчесто циркулира меѓу птиците, а може да ги зарази и луѓето и коњите.
Кај најголемиот дел од заразените нема симптоми. Околу 80 проценти ја минуваат инфекцијата без клинички знаци, кај околу 19 проценти се јавуваат симптоми слични на грип, додека кај приближно еден процент може да се развијат потешки невролошки компликации.
Случајот во Холандија доаѓа во сезона во која повеќе европски земји бележат зголемена циркулација на западнонилскиот вирус, особено во текот на летните месеци кога активноста на комарците е најголема.