Пратеникот на ВМРО-ДПМНЕ, Бране Петрушевски, на денешната прес-конференција упати остри критики кон раководството на СДСМ и лидерот Венко Филипче, обвинувајќи ги дека се занимаваат со изборните резултати во Унгарија наместо да се фокусираат на сопствените внатрепартиски проблеми.
Според Петрушевски, некогаш релевантната партија СДСМ сега е доведена до ситуација да „тоне во жива кал“ под водство на Филипче и влијанието на поранешниот лидер Зоран Заев.
„СДС којашто треба да биде главна опозиција и коректив на власта, се занимава со сè, само со себе не. Се занимаваат со избори во други држави, а не си ги гледаат своите редови кои им се рушат сè повеќе како кула од карти“, изјави Петрушевски.
Тој посочи на парадоксот во реакциите на опозицијата по унгарските избори, истакнувајќи дека партијата „Тиса“ на Петер Маѓар, чија победа ја слават, е всушност членка на Европската народна партија (ЕПП), каде што членува и ВМРО-ДПМНЕ.
„Од друга страна пак, сестринската партија на СДС и член на Партијата на европски социјалисти од Унгарија освои 1,18% од гласовите. Тоа е нешто слично со рејтингот кој СДС го има во Македонија, и е многу близок до рејтингот на Филипче“, додаде пратеникот, предупредувајќи дека доколку продолжат по стапките на Заев, на СДСМ му се заканува бришење од политичката сцена.
На крајот од своето обраќање, Петрушевски во име на ВМРО-ДПМНЕ му ја честиташе победата на Петер Маѓар, изразувајќи очекување за продолжување на билатералната соработка и заедничка работа на интеграцијата на Македонија во ЕУ.