Пратеникот од редовите на ВМРО-ДПМНЕ, Бране Петрушевски, денеска на прес-конференција упати остри критики кон раководството на СДС и претседателот на партијата, Венко Филипче. Според Петрушевски, опозициската партија продолжува да дејствува во „сопствена реалност“ и одбива да се соочи со фактите.
Петрушевски ја обвини СДС дека поразите на изборите ги претставуваат како победи, посочувајќи на резултатите од парламентарните и локалните избори.
„СДС и Филипче функционираат во сопствена реалност, паралелен свет во кој поразите ги претставуваат како победи, а фактите ги менуваат со конструкции. Време е СДС и Филипче да се разбудат од оваа политичка фантазија и конечно да се соочат со реалноста“, изјави Петрушевски.
Меѓу другото, пратеникот на ВМРО-ДПМНЕ ја обвини СДС дека нема дистанца од претходното раководство предводено од Заев, тврдејќи дека луѓе блиски до него сè уште ја креираат политиката на партијата. Тој истакна дека ниту изборните резултати, како освојувањето на 18 пратеници на парламентарните избори, не биле доволна порака за промена на правецот во СДС.