Пратеникот на ВМРО-ДПМНЕ, Бране Петрушевски, на денешната прес-конференција упати сериозни критики до лидерот на СДСМ, Венко Филипче, во однос на неговиот став кон македонско-бугарските односи. Според него, СДСМ продолжува со релативизирање на националните прашања.
„Додека Бугарија секојдневно испраќа пораки со кои се негираат македонскиот јазик, историја и идентитет, Венко Филипче не гледа никаков проблем. Наместо да застане во одбрана на македонските национални позиции, тој ја убедува јавноста дека нема причина за загриженост“, истакна Петрушевски.
Од опозициската партија обвинуваат дека ваквиот пристап на Филипче претставува слабеење на преговарачките позиции на државата уште пред евентуалното доаѓање на власт.
„Филипче не преговара, не бара гаранции и не поставува црвени линии. Напротив, тој уште пред да добие каква било одговорност од граѓаните испраќа порака дека е подготвен да ги прифати условите кои Македонија со години ги одбива како неправедни и понижувачки. Тоа е однапред прифатен пораз“, нагласи пратеникот на ВМРО-ДПМНЕ.
Петрушевски направи директна паралела меѓу актуелното раководство на СДСМ и претходниот лидер на партијата, посочувајќи дека се користи истата политичка стратегија.
„Истата политика ја водеше и Зоран Заев. Прво ги убедуваше граѓаните дека нема опасност, а потоа следуваа отстапките. Денес Филипче ја повторува истата матрица, прво ги релативизира бугарските барања, а потоа ќе бара оправдување за нивно прифаќање. Затоа Филипче е политичко продолжение на Заев, кој е подготвен да оди и чекор подалеку доколку тоа му отвори пат до власт“, додаде тој.
На крајот од прес-конференцијата, Петрушевски порача дека граѓаните бараат заштита на државните позиции и дека партијата нема да отстапи од зацртаните црвени линии.
„Македонските граѓани не бараат политичари кои однапред капитулираат и ги прифаќаат туѓите диктати. Бараат политичари кои ќе знаат да ги бранат државните и националните интереси. ВМРО-ДПМНЕ нема да дозволи враќање на политиките на попуштање, понижување и национални отстапки. Македонскиот идентитет, јазик, историја и култура не се предмет на преговори и политичко пазарење“, заклучи Петрушевски.