Пратеникот на ВМРО-ДПМНЕ, Бране Петрушевски, на денешната прес-конференција му упати прашање на лидерот на СДСМ, Венко Филипче, дали е пред договор за ново предавство на државата, обвинувајќи го дека неговиот став „прво Бугари во Устав, па сè друго“ отвара сериозни сомнежи.
Поставувајќи прашања до јавноста за заднинските текови, Петрушевски истакна:
– Ова отвора низа дилеми и прашања, меѓу кои главно е тоа дали има комуникација помеѓу Румен Радев и Заев? Потоа следи и прашањето зошто Филипче не зборува за заштита на македонскиот идентитет? Јавноста заслужува да знае дали навистина зад овој став на Филипче е некој нов бизнис договор?
Тој нагласи дека ВМРО-ДПМНЕ е за интеграција на земјата во ЕУ, но исклучиво без диктати од официјална Софија. Во врска со поканата од Красимир Каракачанов кон премиерот Христијан Мицкоски за пречекот на моштите на Цар Самуил, Петрушевски порача:
– Адресата е погрешна, поканата треба да оди на адреса на Заев и Филипче.