Британската полиција денеска изврши распит на петмина мажи осомничени за кривични дела поврзани со експлозиви и тероризам, откако беа уапсени во близина на базата на Кралските воздухопловни сили „Ферфорд“ во западна Англија, која ја користат САД за напади врз Иран.
Властите вчера уапсија тројца од осомничените по дојава дека три големи бели комбиња се упатуваат кон воениот аеродром. Познато е дека во март британската влада им дозволи на САД да користат американски бомбардери стационирани во „Ферфорд“ за напади врз ирански ракетни постројки, од кои беа напаѓани бродови во Ормуска Теснина.
Американскиот претседател Доналд Трамп изјави дека осомничените имале намера да предизвикаат „голема штета“ и потврди дека за случајот спроведуваат истрага британските и американските власти. Во меѓувреме, локална земјоделка пријавила во полиција дека видела група „мажи со качулки и маски“ како трчаат кон нивите.
Британските антитерористички служби сè уште јавно не соопштиле кој е вмешан, но извор запознаен со истрагата изјави дека како најверојатен се разгледува мотив поврзан со Иран. Се истражуваат и други можности, вклучително и руска саботажна операција или исламистички заговор.
Во јули, Корпусот на Исламската револуционерна гарда (ИРЦГ) ја предупреди Велика Британија да не дозволува американски бомбардери да полетуваат од „Ферфорд“, наведувајќи дека секоја база што се користи за напади ќе биде легитимна цел. Иран, пак, повеќепати демантираше вмешаност во напади или заговори на британска и меѓународна почва.
Министерот за одбрана Вес Стритинг за Би-би-си изјави дека нема да шпекулира за мотивите додека трае истрагата, но во врска со пошироката закана додаде: „Знаеме дека Иран и неговите поддржувачи сакаат да ни наштетат. Знаеме дека ја мразат нашата демократија и знаеме дека редовно треба да ги осуетуваме нивните обиди да ги загрозат нашите интереси или интересите на нашите сојузници“.
Велика Британија уште во мај воведе санкции за 12 лица и компании поврзани со Иран поради непријателски активности и дестабилизација.
Околу базата „Ферфорд“ полицијата постави кордон во должина од 400 метри и евакуираше жители од 85 домови. Вчера во близина на трите бели комбиња беше забележан и робот за деактивирање експлозивни направи, а безбедносните мерки околу базата и други американски објекти во земјата се засилени со вооружени полицајци и тешка механизација.
Даунинг стрит соопшти дека премиерот Енди Барнам редовно добива информации за истрагата, поради што го откажа учеството на најмалку два настана од годишната конференција на неговата Лабуристичка партија.