Српското обвинителство го посочи Иван Драгниќ како главна алка во транспортот. Тој е косопственик на компанија во Скопје регистрирана за производство на медицински канабис, но истрагата покажа дека наместо лекови, тој шверцувал марихуана вредна 50 милиони евра за улична продажба.
Според српското Јавно обвинителство за организиран криминал, Драгниќ е клучен играч во оваа меѓународна група. Она што го прави случајот „индикативен“ за истражните органи е податокот дека Драгниќ е косопственик на компанија регистрирана во Скопско за легално производство и преработка на медицински канабис.
Истрагата покажала дека криминалната група дејствувала на меѓународно ниво. Во текот на јануари оваа година, групата набавила над 5 тони марихуана на територијата на Македонија. Според планот на организаторот, токму Драгниќ бил задолжен за транспортот на дрогата преку границата. Тој ја пренел стоката до магацин во сопственост на семејството Спасојевиќ во Србија. Од таму, третоосомничениот Урош Младеновски ја преземал дрогата за понатамошна дистрибуција и продажба.
Покрај огромното количество дрога, чија вредност се проценува на фантастични 50 милиони евра, полицијата на 29 јануари во магацините пронашла и вистински арсенал оружје: четири автоматски пушки и еден рачен фрлач – „зоља“. Запленети се и над 1,5 милиони динари во готовина.
Иако дел од групата е зад решетки, наводниот организатор Александар Мијајловиќ успеал да побегне. Српските власти веќе поднесоа предлог за распишување на меѓународна потерница по него. Осомничените кои се приведени, за време на сослушувањето во обвинителството се бранеле со молчење.