Панична евакуација на десетици работници со заштитни маски на лицата и густ црн чад кој целосно го обви просторот беа денешната драматична слика од Штип, каде избувна и трет голем пожар во близина на штипската млекара.
Поради непосредната опасност од огнената стихија, надлежните служби беа принудени итно да ги повлечат и евакуираат сите вработени од блиската фабрика „Албатрос“, додека пламенот брзо се ширеше на отворениот простор.
„Пеколен ден за штипјани – во моментот гори и кај Штипската млекара, евакуирани се вработените во Албатрос. Пожарот е успешно локализиран во с. Бучиште, но за жал, една куќа е целосно изгорена. С. Ратавица: Ова е критичната точка во моментот, бидејќи еден крак од пожарот брзо се префрла кон ова село“, информираше првиот човек на ЦУК, Стојанче Ангелов.
Претходно во текот на денот, сериозна ситуација беше забележана и кај штипскиот Исар, каде огнот се приближи на само неколку метри до самите куќи, предизвикувајќи вознемиреност кај локалното население.
Паралелно со Штип, исклучително тешка е состојбата и во Пробиштипско, каде што огнената стихија веќе успеа да проголта една куќа, а три авиони „Ер трактор“ во моментов гаснат од воздух.
Директорот на Дирекцијата за заштита и спасување (ДЗС) ја потврди информацијата, но упати смирувачки тонови, нагласувајќи дека се преземаат сите мерки за ставање на пожарот под контрола.
Според податоците на Центарот за управување со кризи (ЦУК), активни се три големи пожари на отворено, а најкритична точка останува селото Ратавица, кон кое брзо се префрла еден крак од пожарот.