Општина Пехчево во изминатиот период реализирала повеќе инфраструктурни проекти, со активности насочени кон подобрување на локалната патна мрежа, јавните објекти и условите за живот на граѓаните, се наведува во соопштение од ВМРО-ДПМНЕ.
Според информациите, реконструирани и изградени се повеќе улици и локални патишта во Пехчево и околните населени места. Меѓу проектите се улицата „Индустриска“, патните правци Чифлик–Умлена и Умлена–Робово, како и улици во селата Чифлик, Робово, Умлена и Црник.
Во тек е реконструкцијата на улицата „Илинденска“, заедно со краците „Мирче Ацев“ и „Даме Груев“, а активности се спроведуваат и во индустриската зона „Чуката“.
Во јавниот сектор, според соопштението, реконструирани се културните домови во Црник и Панчарево, спортската сала „Јане Сандански“, зградата на општината, детската градинка „7 Септември“ и други јавни објекти.
Општината спроведува активности и во областа на заштитата и уредувањето на животната средина. Реализирана е санација на диви депонии, уредување на градската депонија, како и зафати на водоводната и канализациската инфраструктура и јавните површини.
Во соопштението се наведува и дека поддршката е насочена кон младите, спортот, културата и семејствата, преку поддршка на спортски клубови, Локалниот младински совет, културни манифестации, ученици и најмладите.
Од ВМРО-ДПМНЕ посочуваат дека локалната самоуправа продолжува со реализација на проекти и инвестиции со цел подобрување на условите за живот и развој во Општина Пехчево.