Шведскиот парламент ја отфрли кандидатурата на лидерката на шведските социјалдемократи, Магдалена Андерсон, за формирање малцинска влада. Со ова гласање се продолжува периодот на неизвесност околу тоа кој ќе ја преземе премиерската функција по општите избори одржани минатиот месец.
Гласањето во Парламентот заврши со 99 гласа „за“ и 248 „против“.
„Бидејќи повеќе од половина пратеници гласаа против, Парламентот го отфрли предлогот Магдалена Андерсон од социјалдемократите да биде именувана за премиерка“, изјави претседателот на Парламентот, Андреас Норлен.
Засега останува неизвесно кој следен ќе добие мандат и задача да ги истражи можностите за формирање нова Влада.
„Уште од изборната ноќ ми беше јасно дека ќе биде потребно одредено време и дека, најверојатно, ќе бидат потребни неколку гласања за да се именува премиер“, изјави Андерсон пред новинарите веднаш по завршувањето на гласањето.
Тaa претходно изјави дека досега не успеала да обезбеди целосна поддршка за владата, но останува отворена и подготвена да се соочи со нови парламентарни гласања за нејзината кандидатура.
Централнолевичарскиот блок на Андерсон оствари тесна победа на септемвриските избори, освојувајќи 176 пратенички места наспроти 173-те места на десничарската коалиција, но процесот е отежнат поради посточечките внатрешни поделби во врска со идниот состав и политики на новата влада.