Француските власти донесоа одлука за забрана на 40-тиот годишен собир на муслиманите во Париз, кој требаше да започне денеска и да трае до 6 април. Како што соопшти шефот на париската полиција, Патрис Фор, причината за ваквиот потег е енормно зголемениот безбедносен ризик и опасноста од нарушување на јавниот ред и мир.
Одлуката е донесена по директно барање на министерот за внатрешни работи, Лоран Нуњез. Според пишувањата на „Ле Фигаро“, Франција во моментов се соочува со висок степен на терористичка закана, дополнително подгреана од меѓународните тензии. Настанот требаше да се одржи во изложбениот центар „Париз Ле Бурже“ и на него се очекуваа десетици илјади посетители.
Полицијата појасни дека дополнителен проблем е преоптовареноста на безбедносните сили кои веќе се распоредени низ улиците по неодамнешните закани за бомбашки напади. Организаторите, претставени преку Маклуф Мамеш, веќе најавија дека правно ќе ја оспорат оваа забрана.