Европскиот центар за превенција и контрола на болести (ЕЦДЦ) предупреди дека сезоната на грип годинава започнала три до четири недели порано од вообичаеното, поради појавата на нова варијанта на вирусот.
Според ЕЦДЦ, станува збор за подваријанта на сојот H3N2, која се шири побрзо и веќе предизвика зголемување на бројот на заболени во неколку европски земји.
Центарот истакнува дека оваа нова варијанта не е вклучена во овогодишната вакцина против грип, затоа што составот на вакцините бил утврден во февруари, кога варијантата сè уште не била присутна. Поради тоа, бројот на заболени оваа сезона би можел да биде поголем од вообичаениот, особено кај постари лица.
Лекарите напоменуваат дека станува збор за грип со слична тежина како претходните соеви, но помалата ефикасност на вакцината создава ризик од поголема зафатеност на населението.
ЕЦДЦ апелира до граѓаните и здравствените работници да бидат внимателни: да обрнуваат поголемо внимание на хигиената на рацете, да користат маски кога е потребно и да се вакцинираат ако имаат можност, особено во земјите со ниски стапки на вакцинација.