Со свечености во Струга денеска започнува 65-тото издание на фестивалот Струшки вечери на поезијата, една од најзначајните книжевни манифестации во регионот, која и оваа година ќе собере поети, преведувачи, критичари и љубители на литературата од повеќе земји.
Стартот на фестивалската програма ќе биде означен со традиционалното садење дрво во Паркот на поезијата во чест на годинашната лауреатка на наградата „Златен венец“, холандската поетеса Анеке Брасинга. Предвидено е и поетско читање посветено на нејзиното творештво.
Официјалното отворање ќе се одржи вечерва со палење на фестивалскиот оган и читање на „Т’га за југ“, по што ќе следува меѓународната поетска вечер „Меридијани“. Годинашното издание се одржува под мотото „Каде што живее поезијата“ и ќе трае до 29 јуни.
Во рамки на првиот фестивалски ден ќе биде отворена и изложбата „Цвеќе, поезија, мир“ на македонскиот уметник Живко Поповски – Цветин, со која се одбележуваат четири децении од неговото учество на манифестацијата.
Организаторите најавуваат побогата програма во однос на претходните години, со повеќе книжевни настани, меѓународни читања и промоции на нови изданија. Посебно место ќе имаат делата посветени на лауреатката Брасинга, како и изданијата на автори од Европа и светот.
На програмата се и претставувања на кандидатите за наградата „Браќа Миладиновци“, средби со автори и издавачи, дискусии, книжевни промоции и традиционалните фестивалски настани што со години се препознатлив белег на Струшките вечери на поезијата.
Свеченото врачување на наградите „Златен венец“, „Браќа Миладиновци“ и „Мостови на Струга“ ќе се одржи во недела на Мостот на поезијата, додека завршницата на фестивалот е закажана за понеделник во Кавадарци.
На јубилејното издание учество ќе земат околу 70 поети, преведувачи и литературни дејци од Македонија и од повеќе европски и светски земји, потврдувајќи ја улогата на Струга како едно од најзначајните светски собиралишта на поетската уметност.