Цените на нафтата на светските пазари паднаа за повеќе од 4 проценти минатата недела, со што ги избришаа добивките остварени во претходните две недели. Причина за падот се очекувањата дека понудата на нафта повторно ќе ја надмине побарувачката во текот на следната година.
На лондонскиот пазар, цената на барел се намали за 4,1 процент и изнесуваше 61,12 долари, додека на американскиот пазар барелот поевтини за 4,4 проценти, на 57,44 долари.
По краткиот период на благ раст, цените нагло се свртеа надолу, откако трговците изразија загриженост поради прогнозите за значителен вишок понуда во 2025 година.
Според најновите податоци на Меѓународната агенција за енергија (ИЕА), побарувачката за нафта следната година ќе порасне за околу 860.000 барели дневно, што е благо зголемување во однос на претходните проценки. Во исто време, понудата се очекува да се зголеми за дури 2,4 милиони барели дневно, што би довело до глобален вишок од 3,84 милиони барели дневно.
И Организацијата на земји извознички на нафта (ОПЕК) во својот последен месечен извештај ја задржа проценката дека побарувачката ќе порасне за 1,4 милиони барели дневно следната година, што укажува дека понудата сепак ќе ја надмине побарувачката, иако во помал обем отколку што прогнозира ИЕА.
Дополнителен притисок врз цените доаѓа од азиските пазари, каде купувачите бараат значителни попусти за венецуелската нафта поради изобилството од поевтина нафта од Русија и Иран, кои се под санкции.
„И руските и иранските производители значително ги намалија цените, па кинеските купувачи во последните недели ги игнорираа понудите за венецуелска нафта за 14 долари помалку отколку во Лондон“, рече еден трговец.
Од друга страна, цените добиваат одредена поддршка од зголемените тензии меѓу САД и Венецуела. Министерството за финансии на САД во четврток воведе санкции врз шест превозни компании што транспортираат венецуелска нафта, како и врз шест танкери кои неодамна натоварија нафта во земјата.