На планината Голија, во подрачјето на општина Ивањица, југозападна Србија, падна првиот снег оваа сезона. Снежните врнежи ги изненадија мештаните при крајот на септември, додека во пониските предели сè уште се бележат значително повисоки температури.
Според жителите на голиските села, снегот паѓа интензивно, но поради високата температура на воздухот не се задржува на тлото.
„Паѓа прилично силно, но снегулките веднаш се топат. Навикнати сме на долги и студени зими, но снег во септември сепак привлекува внимание“, велат мештаните за РИНА.
Голија е позната по променливите временски услови, долгите зими и снежните врнежи, кои неретко се појавуваат и надвор од зимските месеци.
Меѓу жителите на овој крај се раскажува дека низ годините на планината снег бил забележан речиси во сите месеци, освен во јули.